Malti.F Il-6 Targa A

Ara x’għamlilna l-Coronavirus! Hekk jibda dan il-ktieb li hu miżgħud b’kitbiet differenti. Se ssib żgur xi kitba jew tnejn li jolqtu l-gosti tiegħek. Kont taf li, sknot leġġenda, il-pitirross mhux minn dejjem kellu sidru aħmar? U l-karozza tal-linja, x’inhi tgħidlek illum, inti u taqra dan il-ktieb? Għalkemm tinsab magħluqa f’garaxx, xorta waħda sabet mod kif issemma’ leħenha u kif toħodna vjaġġ nostalġiku lura sal-passat. Min iħobb isir jaf iktar dwar it-tradizzjonijiet, f’dan il-ktieb għandu xalata. Se tiskopri iktar dwar ħlewwiet li jittieklu fi żmien l-Għid, kemm Malta kif ukoll f’pajjiżi barranin. Se ssir taf ukoll dwar it-tradizzjonijiet Maltin u Għawdxin marbutin mal-festi. Jekk tħobb l-avventura, aqra dwar x’għamel jum minnhom l-imqareb Fudge! Dan u iktar se ssibu inti u tqalleb il-paġni ta’ dan il-ktieb.